pa k’in

Xqamöl qi' rik'in ri COCODE Pa K'in ri juna' kan roma xqajo' xojsamaj junam pa ruwi' ri Kaqchikel ch'ab'äl, ri tijonïk, chuqa' ri aq'omanïk. Ja la Pa K'in jun nïm Kaqchikel tinamït naqaj ri Armita k'o wi. Po stape' jub'a' ma konojel ri winaqi' ke la yecho'n pa Kaqchikel, man k'o ta majun aq'omab'äl jay o aq'omanel ncho'n ke re. Xojtikir xqab'än jun ko'öl aq'omanïk ke la. Nqaya' qana'oj pa ruwi' ri q'utu'n chuqa' ri taq aq'omab'äl chike ri yawa'i'. Chuqa' nqasipak aq'om. Janila yojsamaj rik'in ri winaqi' kichajin ri rujotolen rukab'il ri kik' chuqa' ri e rij or ri man yetikir ta yeb'iyin (yojq'ax pa taq kochoch). Nqaya' tijonïk achi'el pa ruwi' ri utziläj ya' o ri rujotolen rukab'il chuqa' ruchuq'a' ri kik'. Roma janila xkajo' ri winaqi' yojsamaj chuqa' rik'in ri aq'om q'ayïs. Chuqa' yojsamaj rik'in ri ajq'ija', ke ri yetikir nkiya' kina'oj chike qawinaqi'. Ronojel ri samaj re' xaxe pa Kaqchikel yojsamaj wi (röj ri nab'ey aj näj yojsamaj ke re pa ronojel ri Iximulew).

chiq’a’l

Xojok rach'ib'il ri molaj ACOTCHI, jun k'exelom molaj chi nk'oje' pa Chiq'a'l. E wok'al ri k'exeloma' chupan ri molaj re', nkiya' aq'om chike jujun ka'i' mil yawa'i'. Jumül xqajo' xojsamaj kik'in ri k'exeloma' o ri Mayab' aq'omanela' ke ri wakamin yojtikir. Wakamin nqaya' chike ri to'onïk rik'in ronojel ri taq tijonïk, chuqa' jujun wuj pa ruwi' ri aq'om chuqa' ri taq aq'omab'äl ch'ich'. Nqaya' tijonïk pa ruwi' ri ojer na'oj chuqa' ri aq'om q'ayïs. Roma qasamaj xtitikir xtinimïr kaq'omab'äl jay. Koma rije' nqatz'ib'aj kutunïk chire julëy chïk molaj aj näj.

tiqaq’omaj qi’

Xqatz'ib'aj yan jun wuj pa ka'i' ch'ab'äl (Kaqchikel chuqa' kaxlan) pa ruwi' ri aq'om q'ayïs chuqa' ri taq yab'il. Ri wuj re' k'o rutzil roma nuya' na'oj pa ruwi' ruqumunïk chuqa' rukusaxïk ri taq aq'om q'ayïs. Chuqa' nuya' ri taq raq'omab'äl chuqa' ruchojmirsaxïk ri yalan k'atzinel yab'il, achi'el ri itzel chuluj, rujotolen rukab'il ri kik, chuqa' ri rusipojïk ri tzamaj. Jumül xk'atzin jun wuj achi'el ri wuj re', chuqa' jumül xkikutuj ri winaqi' po majun b'ey kan xtz'ib'ax. Roma ri' xqatz'ib'aj, wakamin xtqakasoj majun rajil. Chuqa' roma xqatz'ib'aj pa ri ka'i' ch'ab'äl, k'o rutzil ri wuj chwäch ri ruk'aslem ri ch'ab'äl; ri winaqi' nkajo' nkitijoj ki' yetz'ib'an o yesik'in yetikir nkikamuluj rik'in qawuj.

socorro, san pablo jocopilas

Xtikir jun samaj pa ruwi' ri yab'il chi Socorro, jun ral tinamït yecho'n pa kaxlan chuqa' k'ichee'. Ri Socorro nk'oje' ke la pa xulan qa naqaj ri palow. Nqab'än jun b'anoj ya' wakamin, roma ri ya' yalan tz'il. Yojsamäj rik'in jun molaj aj Socorro (ri Consejo Promejoramiento) chuqa' ri Ingenieros sin Fronteras (aj ri nimatijob'äl richin Illinois). Chuqa' jun chik qasamaj pa ruwi' ri ak'wala' man yek'ïy ta. Rije' man yek'ïy ta roma ri ya' po chuqa' roma majun kivitaminas, majun kiwa'im, chuqa' roma ri taq jut e k'o chi kipam. yeqachajij chuqa' nqaya' wa'im, aq'om, vitaminas. Chuqa' yojsamäj pa ruwi' ri ey'aj. Ronojel ri samaj re' nqab'an pa kaxlan chuqa' k'ichee'.